خاص – “اخبار الدنيا”
بقلم د. ميشلين بيطار
شو هالسلم الأهلي اللي معلّق بشعرة ..!
ما منخلّي مناسبة تعتب علينا
لنطلّع القرف اللي فينا.
قنينة مي ، ماتش كرة سلة، انتخابات نقابيّة ، كم لمبة زينة.
الضرب بالبوز..!
وكل مين حامل تلفون بدّو يعطينا رأيه و يتحفنا.
خبراء بكل شي يا مشالله.
ولسانهم سابق عقلهم.
بس التلفون بإيد الغشيم بيعوّر.
شتوة نص ساعة غرّقت بلد بلا كهربا ، ست سنين وبعد ما في خطة لإعادة اموال الناس المنهوبة، اقتصاد ريعي عايش عالشحادة، الجنوب طار فرم و حرق؛ هيدول تفاصيل .
بهالوقت نحنا نازلين نتف ببعض على كم لمبة باروكية من إيطاليا التحتا.
ما عجبتكم الزينة ، ما حبّيتوا الستايل، فهمنا: بس شو جاب الشحن الطائفي كرمال اللّٰه ..؟؟
فات اليمين باليسار و تعوا جرّبوا ردّوا المحبة عن الإيمان !
بلد سوريالي..!
اكبر انفجار و اكبر سرقة فيه ما حرّكوا حدا.
الحرامية فالتين و الزعران مسيطرين ،
سرطان، تلوّث، فقر ، افلاس ، فساد؛
و فريق پاپا نويل عم يتخانق مع فريق رمضان.
أمانة، بس تخلص هالجولة و قبل ما نلاقي شغلة جديدة ندبّح بعضنا عليها، ما تنسوا تدمّعوا و تقولوا لبعض :
ولوّ ، ما كلّنا أخوة ..!
—————-
*طبية، وكاتبة لبنانية
تابع آخر الأخبار والتنبيهات أولًا بأول.
